قال الجنوبي خسارة معنا خلل في الادارة
الأمن بعد الأراضي والجيش يحرس عمارة
ماكان يخطر ببالي نوصل لهذه الحقارة
ماشفت من قبل مثله فساد في كل حارة
باقول كلمة حقيقة وفي صريح العبارة
ذي نشهده ما حصل شي ايام حكم النصاره
جينا على جيل فاسد حب التملك شعاره
البلطجي انسان شاطر البطش عنده شطارة
أين القيم والمبادئ ذي تشهدون انهياره
قهري على جيل ميلن للعلم كانوا منارة
عفاش افسد بلادي رحل وفاته قطاره
لكن اهلي وناسي فسادهم في الصدارة
عدن بلادي الحزينة كانت منار الحضارة
واليوم صارت مدينة مرتع لكل القذارة
مجروح تشكي وتبكي من اهلها ياخسارة
صاروا كما النمل لبيض بينخروها نخارة
كانت عروس الجزيرة مابين جارة وجارة
الأولة في التمدن والتنمية والتجارة
فيها قيادات تحكم متفانية في جدارة
واليوم من هو بمنصب جاب اخوته والصهاره
ظننت من هو جنوبي مخلص لأهله وداره
ظننت بس خاب ظني في بعض أهل الوزارة
شكيت ظلم الاجانب في فعلهم والجسارة
لكن ظلم الاقارب أكبر بقوة دماره
الأجنبي مارحمنا يفرض علينا حصاره
وابن البلد خذ عرقنا ودمنا والعصارة
معنا عصابات تحكم باقولها في مرارة
كلآ مسك له مربع باقي يسور جداره
لمصلحة من عبثهم الوضع يشكي انفجاره
تعذيبهم للمواطن حتى وصل لأفتقاره
الكهرباء كل ساعة لازم يطفوا زراره
مايرحمون المواطن في جو شديد الحرارة
والصرف كل يوم يشهد على الريال انهياره
حتى معاش الموظف ماعاد يكفي سباره
كنا نفكر بدولة من حلم طال انتظاره
وجيش واحد موحد ومستقل في قراره
وأمن يحمي المواطن والظلم يؤخذ بثاره
لكن حلمي تبدد في ناس كانوا خياره
ياهاجسي شد أزرك واعلن عليهم بغارة
لاترتجي اي فاسد صغارهم والكباره
شدد عليهم حصارك في كل وكر ومغارة
الصبر ماعاد يجدي والشعب حدد خياره
مايرحم الشعب فاسد يسرق نهارآ جهاره
ولا يفرط بحقه مهما تكون الخسارة
القهر لو زاد حده ع الناس يظهر اثاره
يا سارق الشعب حذرك لابد يلفاك ناره
الحرية كم عليها سالت دماء في غزارة
والحر ترى حر يبقى يكفي الحليم الاشارة
لابد ما الحق يرجع محد يفرط بداره
وثورة الجوع قادم في يوم حامي غبارة
صلوا على خير خلقه يابخت من حج وزاره
خير البرية محمد رمز الوفاء والطهارة
الشاعر:عادل سند
ليست هناك تعليقات:
إرسال تعليق